skakel-081966
 
top20btn

‘n Moslemvrou in Kanada het die misterieuse persoon bedank wat haar verras het met 25 poppe wat hijabs dra. Dit volg nadat sy op Facebook vertel het hoe moeilik dit is om gepaste speelgoed vir haar dogters te kry. Sheza Hasan het ‘n kartondoos met ‘n nota daarby voor die deur van haar huis in Ontario gekry. Binne-in was die poppe wat almal kopdoeke gedra het. ‘n Foto van die geskenk is op sosiale media versprei.

Die Proteas sal hulle eerste beurt op die tweede dag van hul eerste toets teen Bangladesj in Potchefstroom op ‘n indrukwekkende 298 vir een hervat. Dean Elgar het sy negende toets-honderdtal behaal en hervat vandag sy kolfwerk op 128, met Hashim Amla op 68 nie uit nie. Nuweling Aiden Markram het ‘n groot teleurstelling beleef toe hy gister uitgehaal is met net drie lopies tussen hom en ‘n  honderdtal.

Drie polisie-offisiere is in hegtenis geneem omdat hulle na bewering deelgeneem het aan ‘n mislukte gewapende roof by die Fourways-winkelsentrum in  Johannesburg. Die bende van agt het gister ‘n selfoonwinkel in die sentrum geteiken. Volgens die polisie het veiligheidswagte daarin geslaag om een van die verdagtes vas te keer wat die owerhede toe na sy sewe makkers toe gelei het. Die omstandighede wat tot die offisiere se beweerde betrokkenheid gelei het, word ondersoek.

Die polisie in Duitsland sê ‘n man het ‘n potensieel dodelike gif in kos, insluitend babakos, gesit wat in sommige supermarkte verkoop word. Sy doel hiermee is om miljoene Namibiese doller af te pers. Tot dusver is geen voorvalle van vergiftiging aangemeld nie. Die vermeende afperser het die owerhede per e-pos in kennis gestel van die gif wat hy na bewering in voedselprodukte geplaas het. Hy dreig nou om dit oral in Europa te doen as hy nie etlike miljoene betaal word nie.

Misdaad teen huishoudings en individue van 16 jaar en ouer het effens afgeneem, maar seksuele oortredings het met ‘n skokkende 110-persent toegeneem. Dit is die bevinding van Statistieke Suid-Afrika se “slagoffers van misdaad”-opname vir 2016/2017. Statistikus-generaal Pali Lehohla sê die meeste misdade wat aangemeld word, vind in mense se huise plaas. Die opname toon dat mense oor die algemeen baie onveilig voel, veral wanneer hulle snags êrens heen loop.

Krieket Suid-Afrika het bevestig dat uitvoerende hoof Haroon Lorgat die unie onmiddellik verlaat. Volgens president Chris Nenzani was dit ‘n gesamentlike besluit omdat die werksverhouding versuur het. SuperSport berig dat visepresident Tabang Moroe in Lorgat se plek waarneem terwyl daar begin word met ‘n proses om ‘n nuwe hoof aan te stel.

Die internasionale graderingsagentskap Fitch sê Suid-Afrika se ekonomiese groei gaan beduidend belemmer word deur toenemende politieke onsekerheid in die aanloop tot die ANC se leierskapsverkiesing in Desember. Die ekonoom Dawie Roodt van die Efficient-groep glo talle regstellings sal na Desember aangebring moet word:

Finansminister Malusi Gigaba het weer uitgevaar teen Openbare Beskermer Busisiwe Mkhwebane se ondersoek na die reddingsboei wat die destydse regering aan Absa se voorganger, Bankorp, gegee het. Hy betoog in ‘n beëdigde verklaring in die Hooggeregshof in Pretoria dat Mkhwebane nagelaat het om ‘n behoorlike ondersoek te doen ooreenkomstig haar mandaat. Sy het bevind dat Absa die staat miljarde Rande skuld en dat die mandaat van die Reserwebank gewysig moet word. Gigaba vra dat haar verslag tersyde gestel word.

President Hage Geingob het die Verenigde Nasies Sekretaris Generaal,
Antonio Guterres die versekering gegee dat Namibië nooit Veiligheidsraad
Resolusies sal verontagsaam nie. Dr Geingob het
met sy aankoms in
Windhoek na sy bywoning van die 72ste VN Algemene Vergadering in die
VSA en die inhuldiging van Angola se President, Joao Lourenco gesê hy het
'n positiewe vergadering gehad met Guterres. Hy het onder andere aan
Guterres Namibië se langdurige verhouding met Noord Korea verduidelik
wat die Namibiese Staatshuis en Museum en ander infrastruktuur gebou het.

Die stigter van Playboy, Hugh Hefner, is op 91 oorlede. Hy het in sy huis in Los Angeles, Amerika, gesterf aan natuurlike oorsake. Hefner het die internasionale tydskrif vir mans in 1953 in sy kombuis gestig en dit het die beste verkoper van dié soort tydskrif ter wêreld geword. Dit het later tot ‘n sakeryk uitgebrei wat casino’s en nagklubs ingesluit het. Hefner was beroemd vir sy hedonistiese leefstyl, gewoonlik geklee in sy-nagklere en omring deur pragtige jong vroue. Hy was drie keer getroud en laat vier kinders agter.

Veiligheids- en sekerheidsagentskappe is tevrede dat geen groot voorvalle, geweld of skade aan eiendomme aangemeld is tydens gister se landwye staking en betogings teen staatskaping en korrupsie nie. Die Nasionale Gesamentlike Bedryfs- en Intelligensie-struktuur sê betogers het gehoor gegee aan sy oproep vir vreedsame gedrag, wat wetstoepassing baie maklik gemaak het. Die struktuur sê sekerheidsmagte en betogers het hulle almal verantwoordelik gedra.

Pick n Pay
Paratus
Sample01
Sample02
Sample03
  • m+z-group.jpg
  • spec-savers.jpg
  • Erindi-Ad.jpg
Kosmos aanvaar geen aanspreeklikheid vir die gebruik van en die akkuraatheid van die inhoud van die webtuiste nie.



clearcreative-logo
© Copyright 2017 , All Rights Reserved
Kontak Ons
+264 61 255 985
+264 61 255984
info@kosmos.com.na
verkeer@kosmos.com.na
www.kosmos.com.na