skakel-081966
 
top20btn

Reeva Steenkamp se ouers is hoogs ontsteld oor ‘n nuwe rolprent oor hulle dogter en Oscar Pistorius wat veronderstel is om haar verhaal uit haar en haar ma, June, se oogpunt te vertel. Die fliek Oscar Pistorius: Blade Runner Killer begin volgende maand in Amerika draai. Barry en June Steenkamp sê hulle is nooit geraadpleeg oor die Amerikaanse produksie nie. Die Appèlhof gaan volgende maand die Staat se aansoek teen Pistorius se vonnis van ses jaar vir Steenkamp se moord aanhoor. Die Staat betoog dat dit skokkend lig is.

 Krieket: Die Proteas het Bangladesj met 333 lopies verslaan op die laaste oggend van die eerste toets in Potchefstroom. Die toerspan het sy tweede beurt hervat op 49 vir drie en die laaste oorblywende paaltjies het vinnig gekantel voor al die kolwers terug was in die pawiljoen vir net 90. Die draaibouler Keshav Maharaj het vier paaltjies geneem, Kagiso Rabada drie en Morné Morkel twee. Die tweede en laaste toets begin Vrydag in Bloemfontein.

 Die Hooggeregshof in Oos-Londen het ‘n aansoek van die rol geskrap teen die ANC se Oos-Kaapse verkiesingskonferensie. Regter Belinda Hartley het egter beslis dat dokumente wat ingedien is, gebruik mag word vir ‘n moontlike hersiening van die naweek se byeenkoms. Ondersteuners van die gewese provinsiale voorsitter, Phumulo Masualle, het die hof genader nog voordat ‘n ondersteuner van adjunkpresident Cyril Ramaphosa, Oscar Mabuyane, as nuwe provinsiale leier aangewys is.

Die Amerikaanse polisie sê nou meer as twintig mense is dood in ‘n aanval op ‘n musiekfees in Las Vegas. Meer as honderd mense is gewond. Ooggetuies sê skote is uit die 32ste verdieping van ‘n hotel op feesgangers gevuur. Die polisie het die vermeende aanvaller doodgeskiet en soek na ‘n vroulike medepligtige. Polisielede wat van diens af was, is onder die slagoffers en nog ‘n geregsdienaar is in ‘n bedenklike toestand in die hospitaal.

Voëlgriep het uitgebreek in die voëlpark World of Birds op Houtbaai in Kaapstad. Die park huisves sowat twee en ‘n half duisend voëls en hoofbestuurder Hendrik Louw sê byna 200 moes vankant gemaak word. Die park is steeds oop vir besoekers, hoewel sekere dele onder kwarantyn geplaas is. Minstens 62 gevalle van die H5N8-stam van voëlgriep is sedert Junie in Suid-Afrika aangemeld.

Bangladesj hervat sy tweede beurt op 49 vir drie op die laaste oggend van die eerste toets teen Suid-Afrika in Potchefstroom. Dit is ‘n agterstand van 374 lopies nadat Faf du Plessis gister die Proteas se tweede beurt op 247 vir ses gesluit het. Morné Morkel sal intussen nie vandag vir Suid-Afrika kan boul nie nadat hy ‘n sy verrek het.

Die Springbok-agsteman Uzair Cassiem gaan Saterdag se Kampioenskapstoets teen die All Blacks op Nuweland in Kaapstad misloop. Hy het ‘n ribbesering opgedoen tydens eergister se gelykop-stryd teen die Wallabies in Bloemfontein. Afrigter Allister Coetzee het intussen gesê hy verwag nie dat sy span Nieu-Seeland sal verslaan nie.

‘n Franse soldaat het ‘n man doodgeskiet wat twee jong vroue in Marseille doodgesteek het. Die polisie sê die aanvaller het “Allahu Akbar” uitgeroep tydens die voorval. In Kanada is ‘n man in hegtenis geneem na talle voertuig- en mes-aanvalle in Edmonton, Alberta. ‘n Polisielid en verskeie voetgangers is beseer. ‘n Vlag van die terreurgroep Islamitiese Staat is in die voertuig gevind waarmee die man op mense afgejaag het.

Die nuutverkose voorsitter van die ANC in die Oos-Kaap, Oscar Mabuyane, sê vandag se uitspraak oor ‘n aansoek om ‘n interdik teen die naweek se provinsiale verkiesingskonferensie is bloot ‘n akademiese oefening. Ontevrede afgevaardigdes het gister ‘n dringende aansoek by die Hooggeregshof in Oos-Londen ingedien nog voor die uitslag van die stemmery bekend was. Adjunkpresident Cyril Ramaphosa het in sy afsluitingsrede in die stad gesê hy skaam hom vir die geweld wat die byeenkoms gekenmerk het. Sommige lede moes in die hospitaal opgeneem word.

Suid-Afrika het ‘n nuwe bank wat ondersteun word deur miljardêr Patrice Motsepe se African Rainbow Capital. Die Reserwebank het aan TymeDigital ‘n lisensie toegestaan wat dit die land se eerste nuwe bank sedert 1999 maak.  TymeDigital sal nie nie enige takke hê nie, maar sal deur ‘n 10-jaar-vennootskap met Pick n Pay punte skep waar hulle verteenwoordig word. Die bank se doelwit is om opkomende middelklas-verbruikers en kleinsake- en mikro-ondernemings te bedien.

 Die polisie het ‘n beroep gedoen op alle stakende 10111-werkers om vandag nog terug te keer werk toe of dissiplinêre stappe in die gesig te staar. Die arbeidsoptrede deur lede van die polisievakbond, Sapu, was aanvanklik ‘n beskermde staking. Sedert ‘n ooreenkoms egter in die veiligheid-en-sekuriteitsbedingingsraad bereik is, is die staking onwettig. Volgens die polisiebestuur is Popcru die grootste vakbond op die raad, maar Sapu betwis die aanname.

Pick n Pay
Paratus
Sample01
Sample02
Sample03
  • m+z-group.jpg
  • Erindi-Ad.jpg
  • spec-savers.jpg
Kosmos aanvaar geen aanspreeklikheid vir die gebruik van en die akkuraatheid van die inhoud van die webtuiste nie.



clearcreative-logo
© Copyright 2017 , All Rights Reserved
Kontak Ons
+264 61 255 985
+264 61 255984
info@kosmos.com.na
verkeer@kosmos.com.na
www.kosmos.com.na