skakel-081966
 
top20btn

 Uit Las Vegas word berig dat die aanvaller in Sondag se massa-skietvoorval in die Amerikaanse stad kameras binne en buite sy hotelkamer opgestel het voor hy minstens nege minute lank losgebrand het op mense wat ‘n musiekfees in die straat voor die gebou bygewoon het. Die 64-jarige Stephen Paddock het ook ‘n rekenaar in die kamer gehad saam met toestelle waarmee ‘n geweer gestel kan word om soos ‘n outomatiese wapen aaneen te skiet. Sky News berig dat hy vermoedelik Donderdag by die kamer op die 32ste verdieping van die Mandalay Bay-hotel ingetrek het met minstens 23 vuurwapens by hom. Hy het 59 mense afgemaai en honderde gewond voor hy homself doodgeskiet het.

Die stut Thomas du Toit van die Haaie is na die Springbokgroep opgeroep om ekstra dekking te verleen voor Saterdag se Kampioenskapstoets teen die All Blacks in Kaapstad, terwyl die vleuel Raymond Rhule vrygestel is om vir die Cheetahs in die Pro14 te speel. Skrumbreier Matt Proudfoot sê die skrumstryd gaan weer ‘n sleutelafdeling van die kragmeting wees. Hy verwag ‘n beter vertoning van die Bokke as in die afgelope naweek se wedstryd teen die Wallabies in Bloemfontein, wat gelykop geëindig het.

President Robert Mugabe van Zimbabwe het gewaarsku dat die ANC uitmekaar geskeur word in die aanloop tot sy verkiesingskonferensie in Desember. Hy en president Jacob Zuma het in Pretoria ontmoet op die vergadering van die Suid-Afrika/Zimbabwe-binasionale kommissie. Mugabe het die ANC voorspoed toegewens en gesê die organisasie moet hernuwe en versterk die toekoms binnegaan.

Die SA Menseregtekommissie is bekommerd oor die geweldpleging wat oral in die land voorkom, insluitend politieke geweld wat die instelling glo demokratiese prosesse kan bedreig. Woordvoerder Gushwell Brooks sê politieke geweld belemmer die reg op vryheid en sekerheid

‘n Vergadering word vandag gehou tussen Cosatu, die minister van Sport, Thulas Nxesi, SA Rugby en DSTv na aanleiding van die vakbondfederasie se dreigement om Saterdag te betoog tydens die Kampioenskapstoets tussen die Springbokke en die All Blacks op Nuweland in Kaapstad. Cosatu sê dit is deel van sy veldtog om hom te beywer vir die regstreekse uitsending van rugby op SAUK-kanale. Wedstryde word tans slegs op DSTv regstreeks uitgesaai en Cosatu sê die spel word volgehou as ‘n wit sport waarna slegs gegoede swart- en wit mense regstreeks kan kyk.

Springbokafrigter Allister Coetzee sê hy het vertroue in die vaskopstut Ruan Dreyer in Saterdag se Kampioenskapstoets teen die All Blacks op Nuweland in Kaapstad. Hy het op ‘n nuuskonferensie skeidsregter Ben O’Keefe sê skrum-beslissings bevraagteken in die afgelope naweek se toets teen die Wallabies in Bloemfontein. Die Nieu-Seelander het Dreyer twee keer gestraf vir vermeende oortredings.

Wayde van Niekerk, Luvo Manyonga en Caster Semenya van Suid-Afrika is benoem vir die wêreldbeheerliggaam, die IAAF, se atleet van die jaar-toekennings. Van Niekerk en Manyonga sal in die mansafdeling meeding met atlete soos Mo Farah van Brittanje en Sam Kendricks van Amerika. Semenya kom te staan teen vroue soos Sally Pearson van Australië en Hellen Obiri van Kenia.

Amerikaanse owerhede het ‘n desperate pleidooi gelewer dat mense moet bloed skenk na die dodelikste massa-skietvoorval in die land se geskiedenis. Minstens 59 mense is Sondagaand dood en sowat 527 gewond toe die 64-jarige Stephen Paddock uit die 32ste verdieping van die Mandalay Bay-hotel losgebrand het op mense wat ‘n musiekfees in die strate van Las Vegas bygewoon het. Sky News berig dat mediese sentrums oral in die stad oorvol is en dat bloed dringend nodig is. Die polisie het intussen gewaarsku dat dit ‘n uitgerekte proses gaan wees om al die slagoffers uit te ken.

‘n Vrou is na ‘n hospitaal in Johannesburg gevlieg nadat sy baie ernstig beseer is toe sy twee vegtende hiënas probeer uitmekaar maak het op ‘n plaas in Gauteng. Die vrou van in die vyftig is skynbaar ‘n hiëna-hanteerder van ‘n buurplaas. Haar linkerhand is gedeeltelik afgebyt. Paramedici op die toneel van ‘n vragmotorongeluk naby die Lanseria-lughawe het gehelp om ‘n mediese helikopter te ontbied om die vrou na die Milpark-hospitaal te neem.

Wilco Louw, Dan du Preez, Raymond Rhule en S’busiso Nkosi het in Kaapstad by die Springbokkamp aangesluit wat voorberei vir Saterdag se Kampioenskapstoets teen die All Blacks op Nuweland. Die vier was die afgelope naweek beskikbaar vir hulle Curriebeker- en Pro14-spanne terwyl hulle nasionale spanmaats in Bloemfontein teen Australië gespeel het. Afrigter Allister Coetzee sal Donderdag sy groep vir die kragmeting met Nieu-Seeland bekend maak.

Die polisie van die Amerikaanse stad Las Vegas het minstens sestien vuurwapens, waaronder aanvalsgewere, gekry in die hotelkamer van die aanvaller van Sondagaand se bloedbad tydens ‘n musiekkonsert. Die 64-jarige Stephen Paddock het minstens 59 mense afgemaai en 527 gewond toe hy uit die kamer op die 32ste verdieping van die Mandalay Bay-hotel op feesgangers losgebrand het. Hy het homself daarna om die lewe gebring. Nog agtien vuurwapens en bommateriaal is gekry in een van Paddock se twee huise, maar die polisie kon nog geen inligting kry wat sy optrede verduidelik nie.

Pick n Pay
Paratus
Sample01
Sample02
Sample03
  • Erindi-Ad.jpg
  • spec-savers.jpg
  • m+z-group.jpg
Kosmos aanvaar geen aanspreeklikheid vir die gebruik van en die akkuraatheid van die inhoud van die webtuiste nie.



clearcreative-logo
© Copyright 2017 , All Rights Reserved
Kontak Ons
+264 61 255 985
+264 61 255984
info@kosmos.com.na
verkeer@kosmos.com.na
www.kosmos.com.na