skakel-081966
 
top20btn

Die minister van Polisie, Fikile Mbalula, sê tugstappe word gedoen teen ‘n konstabel van Sandton wat afgeneem is terwyl sy in werkstyd haar probleme met DSTv uitsorteer en mense ignoreer het wat gewag het om sake aan te meld. Hy sê die stappe teen konstabel LC Phaswane moet dien as ‘n waarskuwing aan wat hy beskryf as ander vrot kolle binne die diens.

Wilde en huiskatte byt daagliks meer as ‘n miljoen voëls dood in Australië, wat baie spesies bedreig. ‘n Ondersoek raam dat wilde katte elke jaar 316 miljoen voëls vang en huiskatte 61 miljoen. Die Charles Darwin-universiteit sê waar vorige navorsing gekyk het na katte se invloed op die land se soogdiere, was hierdie die eerste ondersoek na voëls.

Een van die ANC se presidentskandidate, Zweli Mkhize, sê die party moet optree teen mense wat betrokke is by korrupsie om verdere skade aan sy beeld te verhoed. Die ANC se tesourier-generaal het die opmerking gemaak op ‘n mynkonferensie in Johannesburg. Hy sê die bewerings van hebsug teen die Guptas, wat as staatskaping bekend geword het, is kommerwekkend vir die regerende party weens die invloed wat dit op sy beeld het.

AfriForum het as deel van sy nasionale verklikkerveldtog ‘n verslag bekend gestel wat onthul dat staatsdepartement in die boekjaar 2015/2016 sestien miljard Rand wanbestee het. Woordvoerder Monique Taute sê die departemente Vervoer, Water en Sanitasie, en Basiese Onderwys is die vernaamste verkwisters en het saam byna nege miljard Rand wanbestee.

Die Suid-Afrikaanse Bankrisiko-inligtingsentrum, Sabric, het onthul dat daar tot dusver vanjaar ‘n toename van 49 persent in transitio-rooftogte is. Altesaam 232 van die rooftogte het tussen Januarie en Augustus plaasgevind. Die jongste was Maandagaand op  die N1-noord by die Buccleuch-wisselaar in Johannesburg. Sabric sê die rooftogte word uitgevoer deur georganiseerde misdaadsindikate. Die sentrum werk met transito-maatskappye en die polisie saam om die aanvalle af te weer.

Chad le Clos van Suid-Afrika het twee goue medaljes ingepalm op die Wêreldbekerbyeenkoms in Doha, Katar. Hy het die 200 meter vlinderslag en die vyftig meter vlinderslag gewen. Sy landgenoot Doug Erasmus was sesde in die korter afstand. Nog ‘n Suid-Afrikaner, Cameron van der Burgh, het goud verower in die vyftig meter borsslag.

Openbare Beskermer Busisiwe Mkhwebane se personeel probeer belangrike dokumente red wat beskadig is toe die gebou in Lynnwood, Pretoria, oorstroom is tydens eergisteraand se swaar reën. ‘n Woordvoerder sê die dak het ingesak. Die kantoor het vroeër vir Openbare Werke ingelig oor die toestand van die gebou, maar nie reaksie gekry nie.

Die Universiteit van die Witwatersrand in Johannesburg is die jongste instelling om aan te kondig dat hy nie sy ouditkontrak met KPMG Suid-Afrika hernu nie. Dit volg op ‘n vergadering met die nuwe uitvoerende hoof, Nhlamu Dlomu, en verteenwoordigers van KPMG Internasionaal. Visekanselier Adam Habib sê die universiteitsraad het lank besin oor die firma se voorlegging:

 Uit Las Vegas word berig dat die aanvaller in Sondag se massa-skietvoorval in die Amerikaanse stad kameras binne en buite sy hotelkamer opgestel het voor hy minstens nege minute lank losgebrand het op mense wat ‘n musiekfees in die straat voor die gebou bygewoon het. Die 64-jarige Stephen Paddock het ook ‘n rekenaar in die kamer gehad saam met toestelle waarmee ‘n geweer gestel kan word om soos ‘n outomatiese wapen aaneen te skiet. Sky News berig dat hy vermoedelik Donderdag by die kamer op die 32ste verdieping van die Mandalay Bay-hotel ingetrek het met minstens 23 vuurwapens by hom. Hy het 59 mense afgemaai en honderde gewond voor hy homself doodgeskiet het.

Die stut Thomas du Toit van die Haaie is na die Springbokgroep opgeroep om ekstra dekking te verleen voor Saterdag se Kampioenskapstoets teen die All Blacks in Kaapstad, terwyl die vleuel Raymond Rhule vrygestel is om vir die Cheetahs in die Pro14 te speel. Skrumbreier Matt Proudfoot sê die skrumstryd gaan weer ‘n sleutelafdeling van die kragmeting wees. Hy verwag ‘n beter vertoning van die Bokke as in die afgelope naweek se wedstryd teen die Wallabies in Bloemfontein, wat gelykop geëindig het.

President Robert Mugabe van Zimbabwe het gewaarsku dat die ANC uitmekaar geskeur word in die aanloop tot sy verkiesingskonferensie in Desember. Hy en president Jacob Zuma het in Pretoria ontmoet op die vergadering van die Suid-Afrika/Zimbabwe-binasionale kommissie. Mugabe het die ANC voorspoed toegewens en gesê die organisasie moet hernuwe en versterk die toekoms binnegaan.

Pick n Pay
Paratus
Sample01
Sample02
Sample03
  • spec-savers.jpg
  • Erindi-Ad.jpg
  • m+z-group.jpg
Kosmos aanvaar geen aanspreeklikheid vir die gebruik van en die akkuraatheid van die inhoud van die webtuiste nie.



clearcreative-logo
© Copyright 2017 , All Rights Reserved
Kontak Ons
+264 61 255 985
+264 61 255984
info@kosmos.com.na
verkeer@kosmos.com.na
www.kosmos.com.na