skakel-081966
 
top20btn

Die polisie het berigte ontken dat die bestuurder van die vragmotor wat  gister  op die N12-snelweg in Alberton oor talle voertuie gery het, in hegtenis geneem is.’n Polisiewoordvoerder, het aan Netwerk24 gesê die vragmotorbestuurder is na die voorval deur die polisie ondervra, maar is nie gearresteer nie.Vier mense is dood en sewentien ander  beseer in die ongeluk waarby talle motors  betrokke was.Een van die beseerdes is in ‘n kritieke toestand in die hospitaal.

Meer as honderdduisend werksgeleenthede in die Australiese motorbedryf gaan in die slag bly wanneer drie groot internasionale motorvervaardigers hulle aan die land onttrek.

General Motors, Ford en Toyota  het tans aanlegte in Australië.

Aldrie maatskappye het besluit om die produksie van motors in die land te staak.

'n Italiaanse verpleegster word daarvan aangekla dat sy tot 38 pasiënte vermoor het omdat hulle of hul familie haar glo geïrriteer het.

Die 42-jarige Daniela Poggiali is in die dorp Lugo in hegtenis geneem nadat ’n 78-jarige vrou, Rosa Calderoni, weens ’n ongewone hoeveelheid kaliumchloried in haar bloed dood is.

Groot dosisse ka­liumchloried kan ’n hartstilstand veroorsaak.

Die sogenaamde Modimolle-monster, Johan Kotzé, en sy makkers wil die grondwethof vra om op ’n tegniese regspunt aan hulle verlof te gee om te appélleer teen hul skuldigbevinding en lewenslange vonnisse.

Die mans, wat skuldig bevind is aan die aanval op en verkragting van Kotzé se eksvrou, Ina Bonnette, sal aanvoer hulle het nie ’n billike verhoor gehad nie.

Adv. Francois van As, regsverteenwoordiger van twee van Kotzé se trawante, Pieta Mohlake en Sello Mphaka, het gister gesê hulle meen die appèlregters kon nie dié aansoek behoorlik oorweeg het voordat hulle besluit het om dit te weier nie.

 

Die departement van korrektiewe dienste het uitgevaar teen bewerings wat tydens Oscar Pistorius se vonnisoplegging-verrigtinge gemaak is dat gevangenisse in die land  nie voorsiening maak vir gestremde gevangenes nie.

‘n Woordvoerder Mthunzi Mhaga sê die departement maak spesiale voorsiening vir gestremdes en dat daar reeds sulke mense is wat tronkstraf uitdien.

ʼn Proefbeampte en maatskaplike werker, Annette Vergeer het gister  in die hooggeregshof in Pretoria getuig die sementvloere, stort- en toiletgeriewe in tronke is nie geskik vir iemand met Pistorius se gestremdheid nie en dat hy kwesbaar is.

Die burgerregte-organisasie AfriForum het ’n klag van haatspraak teen die Kaapse hip hop-groep Dookoom by die Menseregtekommissie  ingedien.

In die betrokke musiekvideo word erge kru taal gebruik en mense aangemoedig  om plase af te brand.

Die uitvoerende hoof van AfriForum,  Ernst Roets, sê die lied bevat ’n reeks uiters rassistiese en neerhalende opmerkings teenoor witmense oor die algemeen.

Hy sê AfriForum het talle boodskappe ontvang van mense wat erg deur hierdie lied gekrenk voel.

Die Wêreldgesondheidsorganisasie sê die dodetal weens die Ebola uitbreking het tot vierduisend-447 gestyg met die meeste van die slagoffers in Wes-Afrika.

Die assistent direkteur-generaal van die WGO, Bruce Aylward, sê tot tienduisend nuwe weeklikse gevalle van die virussiekte kan binne twee maande aangemeld word indien daar nie daadwerlike stappe gedoen word om die siekte te beveg nie.

Hy sê die tempo van nuwe infeksies in sommige gebiede het egter afgeneem.

’n 19-jarige Zimbabwiese man wat van die moord op ‘n Marokkaanse diplomaat , Fatmi Noureddine, in Monument Park, Pretoria aangekla word, sal vandag in die hof verskyn

Noureddine se kollegas het verlede Dinsdag op sy liggaam in sy slaapkamer afgekom toe hulle na hom gaan soek het omdat hy nie by die werk opgedaag het of sy selfoon beantwoord het nie.

Hy is verskeie kere met ’n skerp voorwerp gesteek en verskeie persoonlike artikels, waaronder ’n selfoon, horlosie en kamera, is gesteel.

Die polisie het van dié artikels in die beskuldigde se besit gevind.

Die ouers van Reeva Steenkamp , die vermoorde meisie van Oscar Pistorius,  gaan die maandelikse betalings wat hy aan hulle gemaak het aan hom terug betaal.

Die Steenkamps  het aanvanklik toe die paralimpiese atleet  die geld aangebied het,  sy aanbod aanvaar aangesien hulle die geld nodig gehad het.

Die hof het  gister gehoor dat June Steenkamp 375-duisend rand wat Pistorius vir die familie aangebied het, van die hand gewys het.

Die staatsaanklaer Gerrie Nel het gesê Steenkamp soek nie sogenaamde bloedgeld nie.

Die Demokratiese Alliansie het 'n Privaatlede Wetsontwerp in die Parlement ter tafel gelê wat, indien dit goedgekeur word, vakbonde in die toekoms vir gewelddadige, onwettige stakings verantwoordelik sal hou.

Die Arbeidsbetrekkinge wysigingswetsontwerp het ook ten doel om die vakbonde aanspreeklik te hou indien eiendom beskadig word of indien lede van die publiek en werkers wat wil aanhou werk, deur stakende werkers aangerand  word.

Doeanebeamptes by die OR Tambo internasionale lughawe in Kempton Park het gister op tik ter waarde van meer 59 miljoen afgekom.

Die dwelms is in dryfaste versteek wat uit Benin in Wes-Afrika na Suid-Afrika gestuur is.

‘n Woordvoerder vir die doeanediens , Erika Muller, sê dis die grootste besending tik waarop daar tot dusver by die lughawe beslag gelê is.

Die dwelms is aan die polisie vir verdere ondersoek oorhandig.

Pick n Pay
Paratus
Sample01
Sample02
Sample03
  • Erindi-Ad.jpg
  • spec-savers.jpg
  • m+z-group.jpg
Kosmos aanvaar geen aanspreeklikheid vir die gebruik van en die akkuraatheid van die inhoud van die webtuiste nie.



clearcreative-logo
© Copyright 2017 , All Rights Reserved
Kontak Ons
+264 61 255 985
+264 61 255984
info@kosmos.com.na
verkeer@kosmos.com.na
www.kosmos.com.na