skakel-081966
 
top20btn

Die minister van Polisie, Fikile Mbalula, het die Weermag gevra om te help met misdaadbestryding in die Wes-Kaap en Gauteng. Dosyne mense is die afgelope ruk dood in geweld in gebiede soos Philippi-oos en Oceanview in Kaapstad. Mbalula sê die toename in geweld, skietvoorvalle en bendebedrywighede in Gauteng is ook ‘n groot bron van kommer en dat selfs kinders slagoffers van misdaad word.

Henri van Breda se regsverteenwoordigers sê hulle kan gedwing word om te onttrek as sy moordsaak verder vertraag word. Sy regspan het in die Hooggeregshof in Kaapstad met sy verdediging begin deur ‘n DNS-kenner te roep wat die Staat se saak uitdaag. Die 22-jarige Van Breda het vroeër skuld ontken aan die moord op sy ouers en ouer broer en poging tot moord op sy suster in hulle huis op Stellenbosch in Januarie 2015.

 AfriForum het Openbare Beskermer Busisiwe Mkhwebane gevra om uit te vind wie betaal het vir die minister van Polisie, Fikile Mbalula, se gesinsreis na Doebai oor die Nuwejaar. Hy was toe nog minister van Sport. Daar word beweer dat Sedgars Sports, wat al langer as ‘n dekade toerusting voorsien vir die SA Sportkonfederasie en Olimpiese Komitee, Saskok, voorsien, minstens die helfte van die koste van 680 duisend Rand gedra het. Monique Taute van AfriForum sê Suid-Afrikaners wil antwoorde hê:

Die wêreld nommer twee, Roger Federer, sê hy is in die wolke oor sy goeie seisoen tot dusver. Die 36-jarige Switser het vanjaar twee grand slam-toernooie gewen om sy totaal na neëntien op te skuif, en nog drie titels ingepalm. Federer verwag nie om die jaar in die eerste plek op die wêreldranglys af te sluit nie, maar fokus nou eers daarna om dié week goed te speel in die Shanghai-meesters in Sjina en gesond te bly.

Al vyf oorlewende gewese Amerikaanse presidente gaan later die maand in Texas deelneem aan ‘n konsert ten bate van noodverligting na die orkane wat dele van die land en Sentraal-Amerika getref het. Barack Obama, George Bush senior en junior, Bill Clinton en Jimmy Carter sal die verhoog deel by die geleentheid by die Texas A&M-universiteit. Rock- en countrysangers sal ook optree.

Die beleërde ouditfirma KPMG Suid-Afrika het ‘n nuwe uitvoerende span aangestel na die omstredenheid rondom sy betrokkenheid by die Guptas. Dit sluit die gerespekteerde geoktrooieerde rekenmeester Gary Pickering in. Ag uitvoerende bestuurders, insluitend uitvoerende hoof Trevor Hoole, het verlede maand bedank. KPMG het daarna verskeie van sy groot kliënte verloor, met die Foschini-groep die jongste wat bande verbreek het. Telkom wag op ‘n ondersoek voor hy besluit of hy die firma langer gaan gebruik.

Meer as honderd seekoeie het in ‘n reservaat in Namibië gevrek en die owerhede vermoed dit is weens antraks. Die diere is dood aangetref in die afgeleë Bwabwata-nasionale park in die noordooste van die land. ‘n Woordvoerder sê soiets het nog nooit voorgekom nie. Foto’s toon dosyne dooie seekoeie wat in riviere lê.

Minstens drie mense is dood en talle beseer in ‘n erge storm wat groot dele van Gauteng getref het. Die nooddiens Netcare 911 sê een mens is dood en twee beseer toe ‘n tornado in die omgewing van Krugersdorp voorgekom het. Hael, reën en wind het skole, winkelsentrums en klinieke beskadig en ‘n brand veroorsaak by ‘n substasie aan die Oosrand, wat kragtoevoer na gebiede soos Benoni onderbreek het.

Die Suid-Afrikaanse Weerdiens waarsku dat ‘n swaar donderstrom Gauteng na verwagting vanmiddag gaan tref. Voorspeller Jacqueline Riet sê inwoners kan hulle staal vir stortreën, sterk wind en hael:

Die Ekonomiese Vryheidsvegters het ses van sy stadsraadslede in Mogale-stad aan die Gautengse Wesrand uit die party verban. Die EVV sê hulle het sy besluit veronagsaam om die begroting te boikot deur saam met die ANC te stem. Die raadslede mag appelleer teen die beslissing, wat onmiddellik van krag is. Die munisipale bestuurder is ingelig dat daar nou ses vakante posisies op die raad is.

‘n Epiese sonkragreis van drie duisend kilometer in woestynhitte is in Australië aan die gang. Dit is daarop gemik om nuwe tegnologie bekend te stel wat eendag kan help om voertuie te ontwikkel. Die wêreldsonkrag-uitdaging is in 1987 die eerste keer gehou en het vanjaar in die stad Darwin begin. Die 41 voertuie is meestal ontwikkel deur universiteite of korporasies.

Pick n Pay
Paratus
Sample01
Sample02
Sample03
  • spec-savers.jpg
  • Erindi-Ad.jpg
  • m+z-group.jpg
Kosmos aanvaar geen aanspreeklikheid vir die gebruik van en die akkuraatheid van die inhoud van die webtuiste nie.



clearcreative-logo
© Copyright 2017 , All Rights Reserved
Kontak Ons
+264 61 255 985
+264 61 255984
info@kosmos.com.na
verkeer@kosmos.com.na
www.kosmos.com.na