skakel-081966
 
top20btn

Polisie in Amerika en die Verenigde Koninkryk ondersoek bewerings dat Hollywood magnaat Harvey Weinstein vroue drie dekades lank seksueel geteister het. Twee Britse aktrises, Kate Beckinsale en Sophie Dix, het ook na vore gekom en Weinstein in die openbaar van onbetaamlike gedrag en seksuele teistering of aanranding beskuldig. Die polisie in Amerika sê hulle ondersoek bewerings wat uit 2004 dateer terwyl polisie in Brittanje ‘n klagte ontvang het oor ‘n beweerde voorval in die 1980’s in Londen.

Amptenare in Botswana sê antraks is gevind in die karkasse van seekoeie wat in die Okavango-rivier gedryf het. Namibië het Maandag aangekondig dat meer as honderd van die diere vermoedelik aan die siekte gevrek het in die afgeleë Bwabwata-nasionale park. Die Okavango vloei deur Namibië voor dit Botswana binnegaan. Mense is gemaan om nie die karkasse aan te raak nie en aan te meld as hulle dooie diere gewaar.

Die Hooggeregshof in Pretoria het bevind dat die anti-apartheidsaktivis Ahmed Timol in 1972 dood is nadat hy by die venster van die destydse John Vorsterplein-polisiestasie in Johannesburg gestamp is. ‘n Geregtelike doodsondersoek het destyds bevind dat hy uitgeval het, terwyl die apartheidspolisie beweer het dat hy selfmoord gepleeg het deur uit te spring. Regter Billy Mothle het ook bevind dat Timol eers aangerand is:

‘n Zimbabwiese aktivis is in hegtenis geneem omdat hy die 93-jarige president Robert Mugabe ‘n lewende lyk genoem het. Die leier van ‘n straatsmous-vakbond, Sten Zvorwadza, is daarvan aangekla dat hy die staatshoof beledig of ondermyn het tydens ‘n onderhoud waarin hy ook gesê het Mugabe is oud en droom dagdrome. Die organisasie Zimbabwiese Regslui vir Menseregte sê Zvorwadza moet nog in die hof verskyn.

Die Appèlhof in Bloemfontein gaan na verwagting môre uitspraak lewer in president Jacob Zuma en die Nasionale Vervolgingsgesag se aansoek in die spioenasiebande-sage. Hulle het verlede maand toegegee dat die gewese hoof van die NVG, Mokotedi Mpshe, in 2009 irrasioneel was met sy beslut om Zuma nie te vervolg op 783 aanklagte van korrupsie nie. Dit hou verband met Suid-Afrika se omstrede wapentransaksie van miljarde Rande.

Rampbestuurspanne in KwaZulu-Natal beraam die hulp wat in gebiede in Durban nodig is na gister se verwoestende storm. Die dodetal staan tans op sewe, maar gaan na verwagting nog styg. Robert McKenzie van die provinsiale nooddiens sê die weer het intussen begin opklaar:

 Die Las Vegas-massamoordenaar, Stephen Paddock, het brandbomkoeëls gevuur in ‘n mislukte poging om ‘n tenk stralerbrandstof te laat ontplof in sy aanval op ‘n skare by ‘n country-musiekfees. CNN berig dat hy die spesiale ammunisie gevuur het na ‘n tenk met 43 duisend vate brandstof by die naburige McCarran-lughawe. Die rondes ammunisie is gekry in die hotelkamer van waar hy later op konsertgangers losgebrand en 59 mense doodgeskiet en honderde gewond het.

 Die vrou met wie die Johannesburgse sakeman Jason Rohde erken het hy ‘n verhouding gehad het, gaan teen hom getuig in sy moordverhoor. Jolene Alterskye is op die Staat se lys getuies wat by die Hooggeregshof in Kaapstad ingedien is. Rohde het eergister skuld ontken aan die moord op sy vrou, Susan, op die Spier-landgoed buite Stellenbosch in Julie verlede jaar. Hy hou vol dat sy haarself opgehang het.

Die wêreld se voorste twee manspelers, Rafael Nadal van Spanje en Roger Federer van Switserland, speel vandag hulle eerste wedstryde op die Shanghai-meesterstoernooi in Sjina. Nadal kom te staan teen die Amerikaner Jared Donaldson en Federer teen Diego Schwartzman van Argentinië. Nadal sal die jaar in die eerste posisie op die wêreldranglys afsluit as hy Sondag die toernooi wen en Federer nie die halfeindronde haal nie.

Krieket Suid-Afrika het homself ‘n verlies van meer as ‘n half miljard Rand bespaar toe hy gister die Suid-Afrikaanse Twintig20-globale liga met ‘n jaar uitgestel het. Waarnemende uitvoerende hoof Thabang Moroe sê KSA sou meer as honderd miljoen Rand verloor het vir elk van die eerste vyf jaar van die kompetisie as dit sou voortgaan. Volgens berigte kan spelers en ander belanghebbendes wat kontrakte aangegaan het, egter steeds vergoeding eis van KSA.

Die dodetal in gister se erge storm in KwaZulu-Natal het tot minstens sewe gestyg. ‘n Vrou en haar dogter het gesterf toe ‘n muur op hulle geval het toe hulle die Prince Mshiyeni-hospitaal op Umlazi in Durban verlaat het. Sewe ander hospitale is beskadig. ‘n Kleuter word nog vermis nadat sy meegesleur is toe ‘n bewaarskool in Umlazi oorstroom is.

Pick n Pay
Paratus
Sample01
Sample02
Sample03
  • Erindi-Ad.jpg
  • m+z-group.jpg
  • spec-savers.jpg
Kosmos aanvaar geen aanspreeklikheid vir die gebruik van en die akkuraatheid van die inhoud van die webtuiste nie.



clearcreative-logo
© Copyright 2017 , All Rights Reserved
Kontak Ons
+264 61 255 985
+264 61 255984
info@kosmos.com.na
verkeer@kosmos.com.na
www.kosmos.com.na