skakel-081966
 
top20btn

Die omstrede voorsitter van die Suid-Afrikaanse Lugdiens, Dudu Myeni, is verwyder uit haar posisie op die nasionale redery se raad. Die Kabinet het haar volgens berigte vervang met die sakeman JB Magwaza. Die amptelike aankondiging word vandag verwag op die gebruiklike nuuskonferensie na die Kabinetsvergadering. Die SAL het die afgelope vyf jaar meer as vyftien miljard Rand se verlies gely terwyl regeringsteun vir die sukkelende redery sedert 2008 byna 24 miljard Rand beloop het.

 ‘n Vakbondleier sê president Jacob Zuma is van plan om nog ‘n intelligensieverslag te gebruik om adjunkpresident Cyril Ramaphosa se verwydering uit die regering te regverderig. James Motlatsi is ‘n vertroueling en persoonlike vriend van Ramaphosa. Hy het in ‘n onderhoud met eNCA gesê Ramaphosa se loopbaan kan op dieselfde manier beëindig word as dié van die gewese minister en adjunkminister van Finansies, Pravin Gordhan en Mcebisi Jonas.

Verskeie berigte identifiseer die man wat vanoggend op die Kaapstadse lughawe geskiet is, as die hoof van die Sexy Boys-bende, Jerome “Donkie” Booysen. Hy is blykbaar in die bors en maag gewond nadat hy op die lughawe afgelaai is, waarna die aanvallers weggejaag het. Booysen het vanjaar reeds drie sluipmoordpogings oorleef. Die polisie het nog nie die slagoffer se identiteit bevestig nie. Sake het weer na normaal teruggekeer op die lughawe.

‘n Nuwe boek wat Nelson Mandela neëntien jaar gelede begin skryf het oor sy jare as president, is in Johannesburg bekend gestel. Die bekroonde skrywer Mandla Langa het Mandela se oorspronklike manuskrip gebruik om Dare not Linger te voltooi. Die titel is ‘n waarskuwing aan toekomstige leiers oor hoeveel werk nog gedoen moet word om die land gelyk te stel na kolonialisme en apartheid.

Die Sewes-Springbok Stephan Dippenaar het sy uittrede aangekondig en keer terug na sy familieplaas naby Moorreesburg in die Swartland. Die 29-jarige Dippenaar het vir Suid-Afrika se onder 19-span en die Junior Springbokke gespeel, en vir die Bulle en die Bulls Curriebeker- en Superrugby. Hy het sedert 2012 124 wedstryde vir die Blitsbokke gespeel en altesaam 240 punte aangeteken, wat 42 drieë ingesluit het. Dippenaar sê dit het tyd geword om ‘n nuwe hoofstuk in sy lewe aan te pak.

Somalië het ‘n beroep gedoen vir bloedskenkings om beseerdes te behandel na die afgelope naweek se dodelike vragmotor-bomontploffings in die hoofstad, Mogadisjoe, waarin meer as 300 mense dood en honderde gewond is. Die owerhede sê die dodetal gaan waarskynlik styg en nog hulp word benodig. Twee vliegtuie met mediese hulp uit Amerika en Katar het reeds in die stad geland.

Solidariteit en Mango gaan hulle onderhandelings hervat om  ʼn ooreenkoms te probeer bereik om ‘n verlammende staking te beëindig. Dit volg nadat vakbondlede, wat 95 persent van die laekoste-lugredery se werksmag uitmaak, eergister begin staak en groot ontwrigting veroorsaak het. Deon Reyneke van Solidariteit sê die vakbond was nog altyd bereid om te onderhandel terwyl die redery sy rug op die kollektiewe onderhandelingsproses gekeer het.

‘n Bekende in mediakringe sê Suid-Afrikaners kan trots wees op die manier waarop hulle terugveg teen korrupsie. Max du Preez het aan die Kaapstadse Persklub gesê president Jacob Zuma sal dalk binnekort moet kies tussen ‘n lewe in Doebai of die Pollsmoor-gevangenis. Hy sê die burgerlike gemeenskap stry die stryd dié keer sonder Mandela. Du Preez sê die Gupta-skandaal is ‘n geskenk vir die joernalistiek, wat sy beste werk in veertig jaar doen om die korrupsie-skandale bloot te lê.

President Jacob Zuma het uiteindelik ‘n permanente raad vir die SAUK aangestel – meer as drie weke nadat die termyn van die tussentydse raad verstryk het. Dit volg op dreigende hofstappe en bespiegeling oor politieke agendas. Bongani Ngqulunga sê die elf raadslede sal vir ‘n termyn van vyf jaar dien:

President Jacob Zuma het sy kabinet weer geskommel en onder meer ontslae geraak van ‘n kritikus, Blade Nzimande.

‘n Afgeleë dorp in Nieu-Seeland het sy eie vulstasie gebou omdat inwoners keelvol was om vier uur heen en weer te ry om brandstof by die naaste depot te koop. Die 120 inwoners van  Pongaroa op die Noord-eiland het 2,4 miljoen Rand ingesamel met skenkings, rentevrye lenings en ‘n toelaag van die plaaslike owerheid. ‘n Brandstofmaatskappy het ingestem om die res by te dra en die vulstasie is die naweek ingewy.

Pick n Pay
Paratus
Sample01
Sample02
Sample03
  • m+z-group.jpg
  • Erindi-Ad.jpg
  • spec-savers.jpg
Kosmos aanvaar geen aanspreeklikheid vir die gebruik van en die akkuraatheid van die inhoud van die webtuiste nie.



clearcreative-logo
© Copyright 2017 , All Rights Reserved
Kontak Ons
+264 61 255 985
+264 61 255984
info@kosmos.com.na
verkeer@kosmos.com.na
www.kosmos.com.na