skakel-081966
 
top20btn

Daniel Craig se besluit om nog een keer James Bond te speel is deur ‘n reuse- vergoedingspakket gemotiveer. Na die vrystelling van die 2015 Bond-fliek, Spectre, het Craig gesê hy sny eerder sy polse voor hy weer 007 speel. Die Brit kon volgens berigte egter nie nee sê vir die allemintige een-komma-sewe-miljard Rand wat hy aangebied is om vir die vyfde keer die ikoniese rol  te speel nie.

Die voormalige Bafana Bafana-kaptein, Steven Pienaar, sien uit daarna om teen sy voormalige spanmaat in die nasionale span, Benni McCarthy, te staan te kom wanneer die ligaseisoen vanaand in Kaapstad afskop. Pienaar, wat na 16 jaar in Europa terug is in die land, speel vir Bidvest Wits, terwyl McCarthy Stad Kaapstad se nuwe afrigter is. Die wedstryd is vir albei spanne ‘n kleedrepetisie, aangesien hulle volgende Saterdag in die MTN8-halfeindstryd teen mekaar uitdraf.

‘n Regskenner is van mening dat Zimbabwe se eerste dame nie op diplomatieke immuniteit geregtig is nie. Grace Mugabe word daarvan beskuldig dat sy die 20-jarige Gabriella Engels by ‘n hotel in Sandton met ‘n verlengkoord aangerand het. Accountability Now se advokaat, Paul Hoffman, het aan NuusFlits vertel dat iemand in haar posisie hulle nie op diplomatieke immuniteit kan beroep nie …

In Spanje is minstens 13 mense dood en meer as 100 beseer toe ‘n bakkie in ‘n skare ingejaag het by Barcelona se gewilde toeristebestemming, Las Ramblas. Twee mans is in verband met die terreurdaad in hegtenis geneem, maar die bestuurder is nog op vrye voet. Die polisie in Katalonië het later in die dorp, Cambrils, nog ‘n aanval afgeweer toe hulle vyf verdagtes doodgeskiet het wat gordels met plofstof gedra het. Ses burgerlikes is in die skermutseling beseer.

Rafael Nadal van Spanje het die Fransman Richard Gasquet maklik verslaan in sy eerste wedstryd op die Cincinnati-ope in Amerika. Die eerste gekeurde het met 6-3 6-4 gewen en speel volgende teen sy landgenoot Albert Ramos-Vinolas. Nadal is reeds verseker van die eerste posisie op die wêreldranglys wanneer dit Maandag aangepas word.

Oscar Pistorius is gister toegelaat om die Atteridgeville-gevangenis in Pretoria te verlaat om sy ouma se begrafnis by te woon. Sy 93-jarige ouma aan moederskant, Joyce Bekker, is verlede week oorlede. Korrektiewe Dienste het bevestig dat die veroordeelde moordenaar gistermiddag na die tronk teruggekeer het waar hy sy vonnis van ses jaar uitdien vir die dood van sy vriendin, Reeva Steenkamp.

Die Demokratiese Alliansie het Zimbabwe se aanspraak verwerp op politieke immuniteit vir sy presidentsvrou, Grace Mugabe. Die buurland sê sy behoort nie vervolg te word vir aanranding nie aangesien sy op amptelike sake in Suid-Afrika is. Mugabe is glo van plan om die naweek die beraad van die Suider-Afrika-ontwikkelingsgemeenskap in Pretoria by te woon. Die DA sê immuniteit vir staatshoofde is nie van toepassing op eggenote nie.

En die Britse akteur Daniel Craig het bevestig dat hy weer James Bond gaan speel. Hy het in ‘n onderhoud op die Amerikaanse televisieprogram The Late Show erken dat hy die vyfde keer Agent 007 gaan wees. Craig wou tot nou nie sê of hy weer die geheime agent gaan speel nie.

Taxibestuurders het voertuie beskadig en voetgangers aangeval tydens ‘n onwettige betoging in Pretoria, ondanks ‘n oproep van die Tshwane-metropolisie dat hulle nie die wet moet oortree nie. Die ontwrigting volg op bestuurders se eis dat die owerhede gehoor gee aan ‘n Hooggeregshof-bevel dat al hulle boetes afgeskryf moet word. Hulle wil ook hê hulle kollegas wat in hegtenis geneem is vir verkeersoortredings, moet vrygelaat word.

Curriebekerrugby: Die Blou Bulle se afrigter, Nollis Marais, sê die span werk hard aan sy verdediging voor Saterdag se wedstryd teen die Vrystaatse Cheetahs op Loftus Versfeld in Pretoria. Die Bulle het vanjaar 21 drieë gedruk in vier wedstryde, maar ook agtien afgestaan. Marais sê die span het ‘n nuwe verdedigingsplan in werking gestel.

Eskom sê hy is nie in ‘n posisie om kommentaar te lewer op berigte dat nog van sy senior amptenare geskors is nie. Business Day berig dat die kragvoorsiener se verkrygingshoof, Edwin Mabelane, en die waarnemende handels-hoofbestuurder, Charles Kalima, dié week geskors is oor beweerde ongerymdhede waarby maatskappye van die Guptas betrek word. Eskom se finansiële hoof, Anoj Singh, is verlede maand geskors na bewerings dat hy finansiële bystand aan die Guptas verleen het om die Optimum-steenkoolmyn te koop deur voorafbetalings te magtig en ‘n waarborg van 1,6 miljard Rand vir finansiering te verleen.

Pick n Pay
Paratus
Sample01
Sample02
Sample03
  • spec-savers.jpg
  • m+z-group.jpg
  • Erindi-Ad.jpg
Kosmos aanvaar geen aanspreeklikheid vir die gebruik van en die akkuraatheid van die inhoud van die webtuiste nie.



clearcreative-logo
© Copyright 2017 , All Rights Reserved
Kontak Ons
+264 61 255 985
+264 61 255984
info@kosmos.com.na
verkeer@kosmos.com.na
www.kosmos.com.na