Die Springbok-afrigter, Peter de Villiers, se grootste kopseer is om te besluit wie die losskakel in die toetse teen Wallis moet wees. En die teenwoordigheid van buitelandse spelers help hom nie.

Buitelanders soos Frederic Michalak (Sharks) en Tony Brown (Stormers) ontneem tans potensiële Bok-losskakels blootstelling in die S14-reeks.

De Villiers wil graag sien dat Ruan Pienaar meer losskakel vir die Sharks speel. Oor die veelsydige Frans Steyn se kanse sê hy dat Steyn se veelsydigheid nie help nie, omdat die Sharks hom in elke wedstryd in 'n ander posisie inspan.

Volgens De Villiers sal die 22-tal wat in die eerste toets teen Wallis in Bloemfontein speel, beslis ’n paar verrassings insluit. “Dit sal nie noodwendig spelers wees wat jonk in jare is nie, maar eerder jonk in Bok-ervaring”.