Aansoek is gedoen vir ’n hofbevel om die regering te verplig om nasionale wetgewing in te stel om die gebruik van al elf amptelike tale te reguleer en te monitor. Lourens het gesê soos sake nou staan, moet alle ander inheemse tale terugstaan vir Engels wat amptelik deur regeringsdepartemente gebruik word. AfriForum het in ‘n verklaring sy tevredenheid uitgespreek met die saak oor ‘n nasionale taalbeleid. Die adjunk-uitvoerende hoof van AfriForum, Alana Bailey, sê dit is ʼn waterskeiding-saak wat die toekoms van dienslewering aan Suid-Afrikaners in hulle eie tale tot ʼn groot mate gaan bepaal. Sy sê tans word Engels ten koste van alle ander landstale bevorder word en dit het tot gevolg dat die sprekers van alle ander tale in die land soos tweedeklas burgers behandel word en gedwing word om in Engels te funksioneer, of dienslewering te
ontbeer.