’n Gedeeltelike ooreenkoms is na wat berig word tussen die strydende partye in Zimbabwe bereik. Nuusagentskappe berig dat president Thabo Mbeki laat gisteraand bekendgemaak het dat verskeie beginselooreenkomste bereik is en dat dit ’n goeie grondslag bied vir die ondertekening van ’n finale ooreenkoms.  Hy wou nie die besonderhede van die gedeeltelike ooreenkoms bekend maak nie, maar het bevestig dat een van die beginseloorenkomste die aanvaarding van ’n nuwe grondwet vir Zimbabwe is. Hy het ’n beroep op die partye gedoen om die oorblywende ooreenkomste as ’n saak van dringendheid te teken en om voort te gaan met die onderhandelings oor die kwessies waaroor daar nog nie uitsluitsel is nie.