Die Nasionale Redakteursforum, Sanef, sê dit het onder sy aandag gekom dat verskeie joernaliste wat geakkrediteer was om vandag die saak van die ANC-president, Jacob Zuma, te dek, verhoed is om die hof binne te gaan.

Die forum sê in ‘n verklaring daar is geweldige openbare belangstelling in die verhoor in Suid-Afrika en in die buiteland en om toegang aan joernaliste te weier, word die Suid-Afrikaanse publiek wat nie in die hof kan wees nie, hulle reg tot inligting wat in die Grondwet gewaarborg word, ontneem. Sanef sê daar is geen regverdiging om toegang aan geakkrediteerde joernaliste te weier nie en die owerhede moet verseker dat joernaliste hulle werk sonder enige hindernisse kan doen.Intussen het regter Chris Nicholson van die Pietermaritzburgse Hooggeregshof opdrag gegee dat die strafsaak teen die Franse wapenvervaardiger, Thint, tot 8 Desember uitgestel word.  Die staatsaanklaer, Billy Downer, sê daar is 'n ooreenkoms tussen die staat en Thint se regspan bereik en die uitvoerende hoof van die maatskappy, Pierre Moynot, hoef nie die hofsaak by te woon nie. Thint staan saam met Zuma tereg op aanklagte van bedrog en korrupsie.